Hin skelegga blaðakona á frettin.is, Margrét Friðriksdóttir, ákvað að skella í smá uppfærslu um „Covid á heimilinu“ og byrjar svona:
„Nú eru báðar dæturnar búnar að fá Covid en ég hinsvegar greinist ekki smituð og ekki með nein einkenni þrátt fyrir að ég sé mjög útsett hér á heimilinu.“
Margrét segir að „yngri stelpan mín er orðin góð en sú eldri er með smá kvef núna, hún veiktist aðeins meira en hin, ég er að vísu búin að gefa þeim Ivermectin, D-vítamín, lýsi, C-vítamín og Zink eins og Indverjarnir gera og náðu að útrýma Covid og alvarlegum veikindum með þessari formúlu í 241 milljón manna héraðinu Uttar Pradesh.“
Bætir við:
„Ég vil án gríns núna láta rannsaka blóðið í mér og fá skýringar hvers vegna ég er ekki að smitast þrátt fyrir margar tilraunir, sumir virðast vera með náttúrulegt mótefni í líkamanum sem gæti reynst svarið við hinu sanna mótefni sem við öll viljum fá ekki satt?“
Margrét endar færsluna á þessum orðum:
„Mér skilst að 10-15% heimsins séu algerlega ónæmir fyrir flensunni og ég er greinilega ein af þeim. Þetta þýðir ef ég get ekki smitast þá get ég heldur ekki smitað útfrá mér.“