Afmælisbarn dagsins er tónskáldið, söngkonan og gítar- og hljómborðsleikari hljómsveitarinnar Vök, Margrét Rán Magnúsdóttir en hún á stórafmæli í dag. Margrét Rán fæddist árið 1992 sem gerir hana þrítuga í dag.
Margrét Rán og Vök sló heldur betur í gegn er þau unnu Músíktilraunir árið 2013 en bandið hefur verið á miklu flugi síðan. Þá hefur Margrét Rán einnig sungið með Gus Gus við frábærar undirtektir.
Mannlíf hringdi í Margréti Rán og spurði hana út í afmælisdaginn.
„Ég er sem sagt núna á leið til Prag, er sem sagt með Gus Gus tónleika þar í kvöld. Kærasta mín og öll fjölskylda mín er að bíða eftir mér þar, þannig að það verður bara heljarinnar veisla þar í kvöld.“
Það er nóg að gera hjá Margréti Rán á næstunni en hún kemur heim frá Prag á morgun. „Ég kem heim annað kvöld og svo er bara heljarinnar vinnutörn framundan, ég er á deadline með að skrifa tónlist fyrir bíómynd. Það er heimildarmynd sem heitir Motherland og fjallar um fólk sem var rekið frá Bandaríkjunum þegar Trump varð forseti. Þetta er erlend mynd en leikstjórinn er íslenskur. Og svo er ég að fara í Ítalíufrí.“
Mannlíf óskar þessari frábæru söngkonu innilega til hamingju með stórafmælið!