„Bára hver?” spurði Ólafur Ísleifsson, þingmaður Miðflokksins og einn Klaustursþingmanna, er Mannlíf innti hann eftir hvort búast mætti við honum og jafnvel þingflokk Miðflokksins á Báramótabrennu í kvöld. Á viðburðinum verður upptöku Báru Halldórsdóttur frá Klaustri eytt með formlegum hætti við hátíðlega athöfn.
Báramótabrenna er viðburður sem fer fram á Gauknum klukkan 21.00 í kvöld. Þar ætlar Bára Halldórsdóttir klaustursuppljóstrari að eyða klaustursupptökum af símanum sínum, í samræmi við úrskurð Persónuverndar. Úrskurður sem klaustursþingmenn óskuðu eftir er þeir kvörtuðu til Persónuverndar. Viðburðurinn snýr því að formgerð úrskurðar sem varðar málefni þeirra með beinum hætti.
„Lögfræðingurinn minn verður þarna með skörp augu á símanum og tekur eyðinguna upp” segir Bára Halldórsdóttir, uppljóstrari í Klaustursmálinu, sem boðað hefur til Báramótabrennu í tilefni úrskurðar Persónuverndar um að hún hafi brotið persónuverndarlög í klaustursmálinu. „Myndbandið verður svo sent til Persónuverndar.”
Þrátt fyrir að dagskrá viðburðarins snúi að úrskurð Persónuverndar í kjölfar kæru þingmannanna er lítinn áhuga að greina hjá þeim Miðflokksþingmönnum sem rætt var við. „Veit ekkert hvað þú ert að tala um þannig að ég segi bara nei” sagði Gunnar Bragi Sveinsson, þingmaður Miðflokksins. Gunnar hafði ekki áhuga á að heyra frekari útskýringar á Báramótabrennunni.
Sjá einnig: Klaustursupptökur á Bárubrennu að skipan Persónuverndar: „Ég hef svosem ekkert við upptökurnar að gera.”
Orðið Bárubrenna flæktist fyrir Karl Gauta sem hélt fyrst að um áramótabrennu væri að ræða. Þá virtist hann hissa á spurningunni og endurtók spurninguna; „Ætla ég að mæta?” og bætti við „Ég hef ekki hugmynd um þetta. Hef ekki hugmynd um þetta.” Karl Gauti sagðist þá ekki ætla mæta, hann hafi ekkert vitað af þessu.
Ólafur sagðist heldur ekki eiga von á því að mæta; „Maður er nú upptekinn í öðru eins og alþjóð veit,” sagði hann við Mannlíf.
Ætla að eyða upptökunum við kjánalega mikla viðhöfn bráðum. Hugmyndir að nafni og lýsingu á atburðinum? Ætti ég að panta lögregluna? Mæta dulbúinn? Lifefeeda? Panta backupdansara? #klusterfuck #eyðinginmikla
— Bára Halldórsdóttir (@bee_how) June 3, 2019
Bára varð landsfræg undir lok síðasta árs eftir að hafa orðið vitni af fjögurra klukkustunda ölæði og grobbi þingmanna Miðflokksins og Flokks fólksins. Miðvikudagskvöldið 28. nóvember 2018 birtu Stundin, DV og Kvennablaðið fréttir sem unnar eru upp úr hljóðupptöku af samtali fjögurra þingmannanna Miðflokksins; Sigmundar Davíðs Guðlaugssonar, Gunnars Braga Sveinssonar, Bergþórs Ólasonar og Önnu Kolbrúnar Árnadóttur, og tveggja þingmanna Flokks fólksins; Karls Gauta Hjaltasonar og Ólafs Ísleifssonar. Karl Gauta og Ólaf var vikið úr Flokki fólksins. Báðir hafa nú gengið í Miðflokkinn. Stjórn Persónuverndar komst að þeirri niðurstöðu í lok maí að Bára Halldórsdóttir hefði brotið persónuverndarlög þegar hún tók upp samtalið í Klaustri í nóvember á síðasta ári. Henni var ekki gert að greiða sekt en skal eyða upptökunni
Ekki náðist í Sigmund Davíð Gunnlaugsson, Bergþór Ólasson eða Önnu Kolbrúnu Árnadóttur við vinnslu fréttarinnar.