Lögreglan á höfuðborgarsvæðinu fór fram á að einn þeirra sem situr í gærsluvarðhaldi vegna rannsóknar á morðinu hrottalega í Rauðagerði sæti jafnframt farbanni. Í dag var viðkomandi úrskurðaður í átta daga farbann.
Farbannið tengist rannsókn á morðinu í Rauðagerði í síðasta mánuði. Viðkomandi hefur setið í gæsluvarðhaldi og átti varðhaldið að renna út næstkomandi miðvikudag.
Svona hljóðar tilkynning lögreglunnar vegna farbannsins:
„Einn var í dag í Héraðsdómi Reykjavíkur úrskurðaður í átta daga farbann, eða til þriðjudagsins 9. mars, á grundvelli rannsóknarhagsmuna að kröfu Lögreglunnar á höfuðborgarsvæðinu í þágu rannsóknar hennar á manndrápi í austurborginni í síðasta mánuði. Viðkomandi hafði áður setið í gæsluvarðhaldi og átti það að renna út nk. miðvikudag. Ekki er hægt að veita frekari upplýsingar um málið að svo stöddu.“