Mynd dagsins að þessu sinni er frá Alþingi. Í matsalnum var boðið uppá köku og hugsaði Gunnar Bragi Sveinsson, þingmaður Miðflokksins, sér gott til glóðarinnar. Hinn dagfarsprúði þingmaður Sjálfstæðisflokksins, Birgir Ármannsson, bauðst til að sprauta rjóma yfir kökusneið Gunnars Braga en líkt og sjá má á myndinni endaði mest af rjómanum á andliti þingflokksformanns Miðflokksins. Niðurstaðan er sú að nú eru vinir og félagar Birgins sammála um að leyfa honum aldrei aftur að handleika rjómasprautur.
„Ég axla ábyrgð,“ segir Birgir Ármannsson.
Gunnar Bragi deildi myndinni á samfélagsmiðlum og sagði:
„Átök á Alþingi eru þekkt en í dag náðu þau inn í matsalinn. Hinn annars dagfarsprúði Birgir Ármannsson þóttist ætla að gefa mér rjóma á kökusneið. Málið er nú í höndum forsætisnefndar … eða þannig.“
Þá bætti Gunnar Bragi við: „Þegar ég fór heim að skipta um föt horfði köttur nágrannans á mig mjög undarlega og sleikti útum!“