„Ef ég teldi að mér stæði ógn af föður þeirra þá myndi ég ekki nálgast barnið,“ sagði bandarískur barnaníðingur á áttræðisaldri í viðtali sem hefur farið eins og eldur í sinu á samfélagsmiðlinum Tik Tok. Myndskeiðið, sem birtist í janúar á þessu ári, er á skömmum tíma orðið eitt af þeim vinsælustu á miðlinum.
Maðurinn, sem ekki kemur fram undir nafni heldur greinir aðeins frá því að hann hafi starfað sem húsvörður í íþróttahúsi grunnskóla og körfubolta dómari hjá yngri flokkum drengja, lýsir því á opinskáan en óhugnarlegan hátt hvernig hann tælir til sín börn og þá sérstaklega hvernig hann velur fórnarlömbin. Á meðan langflestum gætu þótt lýsingar hans ógeðfelldar þá eru þær samt sem áður fræðandi og hafa nokkur foreldrafélög í Bandaríkjunum ákveðið að senda foreldrum grunnskólabarna viðtalið til fræðslu og upplýsinga.
Þessi ákveðni níðingur sóttist eftir því að misnota drengi og aðspurður sagðist hann velja þá sérstaklega eftir heimilisaðstæðum – þeir sem glímdu við vandræði heima fyrir væru líklegri fórnarlömb: „Ég myndi skoða fjölskylduaðstæður og hvort fjölskylda þeirra væri efnuð,“ sagði maðurinn eða með öðrum orðum þá voru fátækari börn líklegri til þess að vera valin.
Hann hélt áfram: „Ég myndi veita þeim sérstaka athygli og hrósa þeim en sú athygli yrði til þess að þeim myndi líða eins og þeir væru sérstakir: „Vá, hann er að sýna mér athygli“ sem er ákveðin aðferð tælinga.“
Þá útskýrði níðingurinn líka hvaða börn hann myndi ALLS EKKI leitast eftir að tæla en það voru börn sem áttu feður sem honum stæði mögulega ógn af: „Þá myndi ég heldur ekki reyna að tæla drengi sem ætti vini sem hann væri líklegur til þess að segja frá.“
Eins og áður segir birtist viðtalið fyrst á Tik Tok en miðillinn er vinsæll hjá ungum sem öldnum en samkvæmt nýjustu tölum eru notendur þess gríðarlega margir og úti um allan heim. Í september voru þeir yfir milljarður eða þúsund milljónir.