Ninna sóknarprestur biður þig að yfirgefa ekki Þjóðkirkjuna: „Þú refsar sókninni þinni“

Ninna Sif Svavarsdóttir, sóknarprestur og formaður Prestafélags Íslands, biður landsmenn um að segja sig ekki úr Þjóðkirkjunni þó þeir séu ósáttir við yfirstjórn kirkjunnar. Það bitni nefnilega aðeins beint á sóknunum að segja sig úr söfnuðnum.

Ástæða fyrir færsluskrifum Ninnu á Facebook er sú að í dag rennur út sá frestur að skrá sig í eða úr trúfélögum. Það er því í dag sem talning fer fram á því hversu margir eru skráðir í félögin og úfrá henni greidd sóknargjöld hlutfallslega til safnaðanna. Ninna undirstrikar í fæslu sinni að gjöldin fara ekki í að borga yfirstjórn kirkjunnar. „Ég hvet ykkur því eindregið til þess að skoða ykkar skráningu því hún hefur áhrif á hvaða starfsemi er heima hjá ykkur. Af augljósum ástæðum tala ég fyrir því að sem flestir skrái sig í þjóðkirkjuna. Það geri ég því ég veit að sú þjónusta sem kirkjan veitir er að stórum hluta greidd með sóknargjöldunum. Sóknargjöldin fara ekki í það að borga fyrir yfirstjórn kirkjunnar. Þau greiða ekki laun presta, biskups, vígslubiskupa eða annarra starfskrafta biskupsstofu,“ segir Ninna og heldur áfram:

„Sóknargjöldin fara beint og óskipt til þinnar heimasóknar. Með sóknargjöldum er greitt fyrir organista, djákna, æskulýðsleiðtoga, kirkjuvarðar og alls annars starfsfólk sem sóknin þín hefur. Sóknargjöldin borga fyrir kórastarf, barna- og æskulýðsstarf, veitingar og kaffi. Sóknargjöldin borga fyrir viðgerðir og rekstur kirkjunnar þinnar. Ef þú ert eða hefur verið ósátt/ur við stjórn kirkjunnar en finnst starfið sem sóknin er að vinna gott, ekki segja þig úr kirkjunni vegna þess. Þú refsar sókninni þinni en ekki stofnuninni þjóðkirkjunni með því að segja þig úr kirkjunni.“