Íslendingar þekkja vel það frelsi og vellíðan sem felst í fjallgöngum í gríðarlegri náttúrufegurð landsins. Náttúruhlauparar ná að fara yfir stærra svæði á skemmri tíma en þeir sem eru fótgangandi og sjá því hluti sem aðrir kannski missa af. Ýmist er hlaupið á manngerðum stígum og kindaslóðum eða þvert yfir móa, tún, fjöll og mela, hvert sem leið liggur í náttúrunni.
Náttúruhlaup kallar á annan búnað en hefðbundið götuhlaup. Þó svo að fatnaðurinn sé að mörgu leyti svipaður er æskilegt að hlaupa í skóm sem eru með grófari sóla og eru einnig lægri og með minni dempun til þess að draga úr hættunni á að fólk misstígi sig. Þá er mikilvægt að hafa alltaf farsíma meðferðis því hann er öryggistæki ef maður villist, slasar sig eða einfaldlega gleymir sér á hlaupunum. Símar eru líka útbúnir GPS-tækni sem hjálpar að rata og við skráningu upplýsinga en hægt er að sækja smáforrit til að halda utan um upplýsingarnar. Sumir kjósa að nota frekar GPS-úr sem eru fyrirferðarminni og veðurþolnari en farsímar, á meðan símarnir eru hins vegar oft með betri skjá.