Lögreglan á höfuðborgarsvæðinu leitar ökumanns bifhjóls sem ók á konu á reiðhjóli á göngustíg í Elliðaárdal. Atvikið átti sér stað norðan Stekkjarbakka á fjórða tímanum í gær. Þetta kemur fram í tilkynningu lögreglunnar og segir þar:
„Ökumaður bifhjólsins mun hafa numið staðar örstutt á vettvangi til að taka upp brak úr bifhjólinu, en síðan ekið áfram eftir göngustígnum til austurs án þess að kanna nokkuð með ástand konunnar. Hún var flutt á slysadeild og reyndist hafa handleggbrotnað við áreksturinn.“
Lögreglan ítrekar að þegar svona gerist sé það mikilvægt að ökumenn gangi úr skugga um að engin meiðsl hafi hlotist af né að skemmdir hafi orðið. Þá sé það einnig áríðandi að málið sé tilkynnt til lögreglu. „Ekki síst vegna þess að áverkar eru ekki alltaf sjáanlegir á vettvangi.“
Lögreglan biður ökumann bifhjólsins um að gefa sig fram en hafi aðrir orðið vitni að slysinu eru þau sömuleiðis beðin um að hafa samband við lögreglu í síma 444-1000.