Ljóðskjáldið Ásdís Óladóttir les mestmegnis ljóð, skáldsögur og bækur um listfræði til að fræðast og af forvitni um hvað er í gangi hverju sinni í bókmenntum og listheimum. Þessar þrjár segir Ásdís hafa haft mest áhrif á sig.
Algjör himnasending
„Fyrir unga konu í skápnum árið 1987 var sagan María og Margrét eftir Régine Deforges í þýðingu Sigurðar Pálssonar eins og himnasending þegar hún kom út.
Hún olli staumhvörfum í hausnum og var eins og frelsun um leið og lesið var um lesbískt ástarsamband. Atburðarásin á sér stað bak við tjöldin og veröldin fyrir utan hefur hvorki umburðarlyndi né skilning á hinsegin ást. Frá árunum 1903-1905 er sagan sögð í formi bréfa og á pappírinn streymir fram ást, þrá og ótti eða leyndarmál þeirra.“
Stórbrotin ævi
„Nína S. eða ævisaga Nínu Sæmundsdóttur myndhöggvara, skráð af Hrafnhildi Schram listfræðingi, er áhrifarík saga. Þar er fjallað um stórbrotna ævi fyrstu íslensku konunnar sem varð myndhöggvari. Fyrir utan það að kynnast merkilegum ferli Nínu sem listamanns þótti mér áhugavert við lestur þessarar bókar að Nína átti sambýliskonu sem hét Polly James og bjuggu þær stöllur saman í rúm tuttugu ár í Hollywood. Þar vann konan hennar við handritsgerð fyrir Universal Studios. Þær áttu marga samkynhneigða vini en að vera lesbía í Hollywood á þessum árum þótti ekki tiltökumál meðan það var hneyksli og refsivert annars staðar í Bandaríkjunum.“
Hvert smáatriði úthugsað
„Að eilífu ástin, skáldsaga eftir Fríðu Bonnie Andersen sem kom út um jólin er ein af þeim bókum sem eru í miklu uppáhaldi. Lykilpersóna sögunnar er trans kona og er henni lýst af mikilli næmni og væntumþykju án allrar skrumskælingar eða skringigervingar sem stundum hefur loðað við þegar fjallað er um hinsegin fólk í bókmenntum eða kvikmyndum. Lykilpersónan opnar heim að sögu þar sem lesbískar ástir leika aðalhlutverkið og er bókin skrifuð af miklu listfengi og alúð þar sem hvert smáatriði er úthugsað.“
Fyrir mistök birtist mynd af listakonunni Nínu Tryggvadóttur með þessari umfjöllun í 10. tölublaði Mannlíf og er hér með beðist afsökunar á því.