Sigurður G. Guðjónsson, lögmaður og eigandi Frjálsrar fjölmiðlunar, slasaðist illa á mánudag þegar hann féll þrjá metra úr stiga. Sigurður var að mála húsið sitt þegar óhappið átti sér stað og segist hafa vera hræddur um að vera lamaður eftir fallið.
„Það var fyrsta hugsunin,“ sagði Sigurður í útvarpsþættinum í Bítinu í morgun. Var Sigurður að mála þakið á húsinu sínu þegar stigi sem hann stóð í rann skyndilega undan honum með fyrrgreindum afleiðingum. Við fallið braut hann fimm rifbein og sum þeirra illa. Í þættinum sagðist hann eiga erfitt með að hreyfa sig og ef ekki væri fyrir stöðuga mænudeyfingu væri hann illa verkjaður.
Sigurður liggur nú á hjarta- og lungnadeild Landspítalans og reiknar með að það taki hann um sex vikur að jafna sig. Hann sagðist ætla að hafa varann á í framtíðinni. „Ég held að ég muni aldrei fara upp á þak aftur án þess að vera með fallvörn til að setja á skorsteininn.“
Sigurður greindi fyrst frá slysinu á Facebook-síðu sinni á mánudag og birti þar meðfylgjandi mynd, sem sýnir hann á Landspítalanum.