Eins og Mannlíf hefur greint frá nýverið er nokkur óánægja með það að verið sé að skipta út plasti yfir í pappír er kemur að matvælum eins og skyri og kókómjólk. Í stað plastskeiðar fylgir nú einhvers konar pappírs skeið og rör á drykkjarfernum eru einnig orðin úr pappír.
Í hópnum Matartips á Facebook er nú komið í gang uppboð á plaströrum og plast gaffli. Auðvitað til gamans gert en uppboðinu startaði Arna nokkur og í upphafsinnlegginu bauð hún upp á eitt plaströr með þessum orðum: „Plaströr. Selst hæstbjóðanda“. Síðar hljóp aldeilis á snærið og hún uppfærði það sem í boði var: „Uppfært: Tvö!! plaströr og einn plastgaffall. Selst saman eða í sitthvoru lagi“. Arna velti því svo fyrir sér hvort hún ætti ef til vill frekar að fara með herlegheitin á Árbæjarsafnið.
Magir voru áhugasamir um uppboðið eins og sjá má á eftirfarandi ummælum:
Erla var áhugasöm en vantaði upplýsingar: „Væri gott að vita ef það eru komin einhver boð svo maður veit hvað maður á að bjóða“. Snorri bauð milljón dollara í allan pakkann. Pétur bauð rausnarleg skipti: „Skipti við þig á rörinu og innkaupapoka úr ekta plasti“. Edda og Agli var í sömu hugleiðingum og Pétur: „Er með grænan 10-11 poka fyrir áhugasama“ og „Er með antík bónus poka úr ekta plasti, mjög vel með farinn“. Boð í gripina streymdu inn allt frá 10.000 krónum upp í 500.000 krónur. Það var svo einn meistari sem bað um fleiri myndir af uppboðsgripunum. Bergþóra lét í ljós vanþóknun sína á nýju rörunum: „Vil fá þessi aftur ekki pappa rusl“.
Það er ábyggilega enn opið fyrir tilboð en sennilega er vert að hafa mjög hraðar hendur.