„Hvar er þetta að birtast?,“ spurði Ragnar Gunnarsson framkvæmdastjóri Brandenburg í viðtali við Mannlíf í gær. Átti hann við viðtal sem birtast átti í Vikunni síðar um daginn.
Í viðtalinu segir Hödd Vilhjálmsdóttir, fyrrverandi kona hans, meðal annars frá meintu ofbeldi sem hún hafi þurft að þola, bæði líkamlegu og andlegu. Hödd nafngreinir Ragnar ekki í viðtalinu, en stuttu eftir samtal hans við blaðamann Mannlífs bárust Birtíngi hótanir um lögsókn ef viðtalið yrði birt í Vikunni. Þrátt fyrir það var viðtalið við Hödd birt og steig Ragnar til hliðar úr framkvæmdastjórastöðu í morgun.
Í gær var Ragnar spurður hvort hann kannist við það að hafa nokkur tímann beitt ofbeldi af einhverju tagi.
„Ég verð bara að fá að heyra í þér á eftir,“ svaraði Ragnar og bað blaðamann um að senda sér tölvupóst vegna málsins.
Í yfirlýsingu Ragnars á Facebook-síðu hans í morgun segist hann vera sár vegna viðtalsins. Þá hvorki staðfestir hann ásakanir Haddar né vísar þeim á bug í yfirlýsingunni heldur talar um forræðismál sem Hödd nefndi hvergi í viðtali sínu.
Hér að neðan má lesa yfirlýsingu Ragnars í heild:
„Mér þykir ákaflega sárt að lesa lýsingar barnsmóður minnar í viðtali við Vikuna en ég tel ekki rétt að úttala mig um mína hlið í fjölmiðlum. Deilur okkar, sem varða forræði, eru í sínu rétta ferli. Ég mun stíga til hliðar úr starfi mínu sem framkvæmdastjóri hjá Brandenburg. Ég tel mér ekki fært að sinna því starfi fyllilega á sama tíma og ég tekst á við þetta mál með hagsmuni dóttur okkar að leiðarljósi.“