,,Þegar konan öðlast jafnan rétt á við karlinn verður hún ráðandi yfir honum,” skrifar Ragnar Önundarson á Facebook í tilefni Kvenréttindadagsins. Hann segist hafa þetta eftir gríska heimspekingnum Sókrates.
,,Náttúran hefur fært konum svo mikil völd að löggjafinn hefur löngum verið tregur til að auka þar við“ sagði einn lordinn þegar kosningaréttur til handa konum var til umræðu í breska þinginu fyrir einni öld síðan,” skrifar Ragnar og bætir við: „Þetta er búið að vera langt strîð. Ætli sé ekki best að lýsa yfir uppgjöf, í von um mannúðlega meðferð?”
Þetta er ekki í fyrsta skipti sem Ragnar lætur athæfi kvenna sig varða. Haustið 2017 gagnrýndi hann Áslaugu Örnu Sigurbjörnsdóttur, ritara og þingkonu Sjálfstæðisflokksins, fyrir mynd sem hún birti á Facebook: „Þessi unga kona var í sjónvarpi í kvöld að ræða um kynferðislega áreitni við konu í stjórnmálum. Meðfylgjandi mynd hefur hún notað sem „prófílmynd“ á FB. Sjálfsagt finnst sumum engu skipta hvernig myndir fólk í stjórnmálum notar til að kynna sig. Dæmi hver fyrir sig.“
Samkvæmt Facebook færslu Áslaugar var umrædd mynd gömul. „Hann ákvað að leita að eldri mynd sem væri hentug gagnrýni hans og pósta henni hjá sér. Það er auðvitað ákveðin kirsuberjatýnsla.“ DV greindi frá.
Ragnar endurtók gjörninginn í maí síðast liðinn þegar hann gagnrýndi forrystu Sjálfstæðisflokksins: „Miðaldra, hvítur, kristinn karlmaður, helst reffilegur og peningalegur, er formaður. Glæsilegasta konan er varaformaður og sætasti krakkinn ritari. Þetta er afleiðing af valdatilfærslu prófkjöranna,“ skrifaði Ragnar í Facebook færslu. Hér á hann við þau Áslaugu Örnu, Bjarna Benediktsson formann og Þórdísi Kolbrúnu R. Gylfadóttur varaformann. Tilefnið var barátta Orkunnar okkar gegn innleiðingu þriðja orkupakkans en Ragnar er liðsmaður hópsins.