Ragnar Þór Ingólfsson formaður VR gagnrýnir Icelandair fyrir óþrifnað í flugvélum félagsins í færslu sinni í Facebook.
Ragnar Þór kom nýlega heim frá München í Þýskalandi og segir matseðla og aðra bæklinga sem voru í sætisvasanum fyrir framan hann hafa verið illa farna og drulluskítuga. Farþegar eru vanalega hvattir til að kynna sér bæklingana til að kaupa veitingar og varning sem er til sölu í viðkomandi flugvél.
„Þessu lesefni, sem ætlað er farþegum til að panta sér mat og drykk eða versla, er auðsjáanlega hvorki endurnýjað eða þrifið nema að litlu leiti,“ segir Ragnar Þór.
München er ekki skilgreint sem áhættusvæði, en eigi að síðu komu tveir af þeim 20 sem nú eru greindir með COVID-19 til Íslands með flugi frá München.
„Einhverjir smitaðir hafa komið með þessum vélum dagana áður, og get ég fullyrt að þegar ég tók upp áðurnefnda bæklinga varð mér ekki um sel. Þeir voru drulluskítugir, krumpaðir og kámugir og plöstin litlu skárri og litu út eins og að hafa verið á biðstofu á annasömum stað í c.a. áratug eða meira,“ segir Ragnar Þór og hvetur jafnframt Icelandair til að gera viðeigandi ráðstafanir.
„Svo því sé haldið til haga þá sprittaði ég mig í bak og fyrir eftir að hafa snert á þessum ófögnuði.“