Björn Leví Gunnarsson, þingmaður Pírata, segir að forseti Alþingis hafi reynt að lauma frumvarpi inn í dagskrá Alþingis í gær. Um er að ræða lagafrumvarp um að lífeyrissjóðum verði heimilt að taka aukna áhættu í fjárfestingum sínum til að geta keypt meira í Icelandair.
Í september er fyrirhugað hlutafjárútboð Icelandair flugfélagsins sem þjóðin virðist sitja uppi með. Ríkisstjórnin hefur lofað félaginu lánalínu með ríkisábyrgð fyrir allt að 16.5 milljörðum króna og nú segir þingmaður Pírata fjármálaráðherra lauma inn frumvarpi um auknar heimildir lífeyrissjóðanna til kaupa í Icelandair. Þessu heldur Björn Leví fram í færslu á Facebook.
Umrætt frumvarp kemur frá Bjarna Benediktssyni, fjámála- og efnahagsráðherra. Björn Leví segir að með þessu sé hægt að læra lexíu um forgangsmál ríkisstjórnarinnar. „Lexían er að ríkisstjórnin er til í að reyna að smygla inn máli um auknar áhættufjárfestingar lífeyrissjóða en ekki til í að reyna að smygla inn máli um strandveiðar í september. Merkilegt,“ segir Björn Leví.