Starfslok Eiðs Smára Guðjohnsens og umræddan gleðskap landsliðsins voru til umræðu í hlaðvarpsþættinum Þungavigtin í gær.
Ríkharð Óskar Guðnason, Rikki G, er þáttastjórnandi Þungavigtarinnar, og sagðist hafa verið í sambandi við ónefndan aðila sem var í umræddum gleðskap fyrr í mánuðinum.
Rikki spurði einfaldlega hver glæpurinn sé af hálfu Eiðs Smára:
„Þrátt fyrir ítrekaðar tilraunir hef ég ekki náð á Eið Smára, hann hefur ekki svarað, ekkert frekar en KSÍ. En í dag heyrði ég í aðila sem var þarna á staðnum og svona blasir þetta við,“ sagði hann í þættinum Þungavigtin; rekur atbuðrðarrásina:
„KSÍ býður upp á drykki eftir leikinn á móti Norður-Makedóníu. Það liggur auðvitað ljóst fyrir að mótið er á þessum tímapunkti búið, verkefninu er lokið og skiptingin er þannig að leikmenn eru á einni hæð og starfsliðið á annarri hæð. Það er byrjað að sumbla frekar seint; leiknum lauk seint og landsliðið átti að ferðast snemma morguninn eftir. Allir í starfsliðinu fá sér rauðvín þetta kvöld, það er gripið í spil og verið að fara yfir eitt og annað og í raun og veru lítið sofið. Starfsliðið þarf að vakna klukkan fimm að morgni til og fara í morgunmat og það er ljóst að þegar að þú ert búinn að sofa lítið og fá þér aðeins í glas þá er auðvitað misjafnt ástand á mönnum,“ sagði Rikki og bætti við:
„Landsliðsþjálfarinn fer upp á herbergi klukkan eitthvað og Eiður Smári situr eftir, spjallar við son sinn og annan landsliðsmann áður en að farið er upp á herbergi. Eiður fer upp örlítið seinna, fór aldrei út af hótelinu eða neitt slíkt, það var ekkert vesen. Síðan var mætt í morgunmatinn, illa sofinn og þannig vindur þetta einhvernveginn upp á sig.“
Rikki spurði í þættinum hver glæpurinn hafi verið:
„KSÍ var búið að leggja blessun sína yfir að menn myndu fá sér í glas. Menn áttu bara síðan að mæta í morgunmat sem Eiður gerði að mér skilst. Það var talað um að einhver hefði mætt seint í rútuna, en það var hvorki Eiður né þessi leikmaður sem á að hafa farið yfir strikið í drykkju, Jón Dagur Þorsteinsson, sem gerðu það. Birkir Már Sævarsson mætti of seint í rútuna og það tengist þessu ekki neitt. Hver er glæpurinn?“
„Það er enginn glæpur,“ svaraði Mikael Nikulásson, fótboltasérfræðingur þáttarins.
Ítrekaðar tilraunir hafa verið gerðar til að leita svara vegna uppsagnar Eiðs Smára, en aðilar sem ættu svara fjölmiðlum um málið, innan KSÍ, hafa ekki gert það.
Reyndar sagði Ómar Smárason deildarstjóri samskiptasviðs sambandsins í samtali við vefmiðilinn 433.is í dag að ákvörðunin hafi verið tekin með persónuleg málefni Eiðs Smára í huga, án þess að útskýra það nánar.