Komið er á daginn að Hafnarfjarðarbær braut lög við meðferð á máli barns er var gegn vilja sínum flutt í svokallað einveruherbergi í grunnskóla í bænum; kemur þetta fram í áliti mennta- og barnamálaráðuneytisins í málinu; ráðuneytið gagnrýnir samskipti bæjarstarfsmanna við foreldra barnsins eftir atvikið áðurnefnda, en þetta kemur fram á Vísi.
Barnið var einungis níu ára gamalt er atvikið varð; barnið var lokað inni í einveruherberginu eftir að hafa farið inn á stjórnendaskrifstofu og velt til munum þar inni.
Greint var frá úrskurði ráðuneytisins í málinu í kvöldfréttum Stöðvar 2 um helgina; að brotið hefði verið gegn barninu með innilokuninni af hálfu Hafnarfjarðarbæjar.
Samhliða úrskurði sendi ráðuneytið Hafnarfjarðarbæ álit; foreldrar barnsins gerðu alvarlegar athugasemdir við meðferð bæjarins á málinu; hvernig samskiptum hefði verið háttað eftir atvikið; þau lýstu skilningsleysi og dónaskap.
Kemur fram að foreldrana og starfsfólkið í skólanum greindi á um hvernig skólavist barnsins ætti að vera eftir atvikið; vildi bærinn að barnið færi í sérúrræði; foreldrarnir að það héldi áfram í sínum skóla.
Þá er greint frá því að slit hafi orðið á samskiptum, að frumkvæði foreldra, og Hafnarfjarðarbær meðal annars vísað til þess að foreldrarnir hafi „rekið mál sitt í fjölmiðlum.“
Telur ráðuneytið að meðferð Hafnarfjarðarbæjar á málinu hafi ekki verið í samræmi við lög; bærinn megi alls ekki koma sér hjá því að finna lausn á málinu með þeim hætti sem hann gerði; framvegis verði Hafnarfjarðarbær að gæta betur að svörum til foreldra; gæta betur að þeim farvegi er ágreiningur um skólavist barna er lagður í hjá bænum.
Rósa Guðbjartsdóttir bæjarstjóri gaf ekki kost á viðtali vegna málsins en Hafnarfjarðarbær sendi yfirlýsingu frá sér.
Yfirlýsing Hafnarfjarðarbæjar í heild:
Hafnarfjarðarbær tjáir sig ekki um einstök mál er varða nemendur í skólum bæjarins. Markmið sveitarfélagsins er ávallt að tryggja úrræði sem setja heildarhagsmuni nemenda og skólastarfs í forgang.
Í því skyni er leitað sérlausna sem sniðin eru að einstökum tilvikum, byggðum á ytri greiningum og ráðgjöf.
Líkamleg inngrip teljast til undantekninga í skólastarfi og er ein vandasamasta og þungbærasta ákvörðun sem starfsmaður getur staðið frammi fyrir.
Skólayfirvöld í Hafnarfirði leggja áherslu á að tryggja öruggar og uppbyggilegar aðstæður og úrræði í skólaumhverfi þar sem farsæld og öryggi allra barna og starfsmanna er í fyrirrúmi.