Rósa Ingólfsdóttir lést í morgun á hjúkrunarheimilinu Hamrar, 72 ára að aldri. Klara Egilsson dóttir Rósu og fjölmiðlakona, greinir frá andláti móður sinnar í færslu á Facebook.
„Elskuleg móðir mín, Guðmunda Rósa Ingólfsdóttir, auglýsingateiknari, stórleikkona, ljóðskáld, tónlistarkona, baráttumanneskja, frumkvöðull, fegurðardís, myndlistarkona, vinkona, lífsfélagi, samferðamanneskja, húmoristi, pistlahöfundur, þáttagerðarmanneskja, sjónvarpsþula, sálufélagi og trúnaðarvinur andaðist snemma í morgun, þann 14. janúar 2020, á Hjúkrunarheimilinu Hamrar, í Mosfellsbæ. Hún hlaut friðsælt andlát og var umvafin ást, hlýju og kærleika til síðasta andartaks. Sofðu rótt, elsku mamma mín. Ég unni þér.“
Rósa var ein þekktasta þula sjónvarpsins, hún starfaði um árabil hjá Ríkissjónvarpinu, fyrst sem fréttateiknari, en síðar sem sjónvarpsþula þar sem hún las dagskrá Ríkissjónvarpsins fyrir áhorfendur, milli dagskrárliða og oft á hnyttin og einlægan máta.
Rósa var fædd 5. ágúst 1947, yngst þriggja systkina. Foreldrar hennar voru Klara Halldórsdóttir og Ingólfur Sveinsson. Rósa útskrifaðit úr Mynd- og handíðaskólanum og var fyrsti teiknari Ríkisútvarpsins. Árið 1992 kom út ævisaga Rósu sem Jónína Leósdóttir skráði, og þar segir Rósa meðal annars hvernig Davíð Oddsson þáverandi borgarstjóri Reykjavíkur bjargaði henni úr fjárhagskröggum með því að kaupa af henni málverk.
Rósa vakti einnig athygli sem söngkona, ljóðskáld leikkona, myndlistarkona og baráttukona, en Rósa var óhrædd við að segja sínar skoðanir og berjast fyrir þeim málstað sem hún trúði á. Rósa samdi meðal annarra lagið hér fyrir neðan.