Ólafur Arnarson, blaðamaður á Fréttablaðinu, er afar seinheppinn ef marka má greinarkorn hans í helgarblaði Fréttablaðsins. Þar fjargviðrast hann yfir ritþjófum á borð við Hannes Hólmstein Gissurarson prófessor og lýsir því yfir að á Fréttablaðinu séu blaðamenn með þeim bestu á landinu og saklausir sem nýfallin mjöll þegar litið er til ritþjófnaða. „… hefur enginn blaðamanna Fréttablaðsins orðið uppvís að því reyna að stilla fram hugverkum annarra sem sínum eigin,“ skrifar Ólafur af lítillæti þess sem veit að hann er öðrum fremri.
Svo óheppilega vill til að Mogginn birtir sama dag ásakanir á Sigmund Erni Rúnarsson, ritstjóra Fréttablaðsins, um að hafa fyrir tæpum 40 árum stolið texta frá Tómasi Guðmundssyni skáldi. Ásökun Moggans er reyndar gríðarlega langsótt og ber þess merki að ritstjórnin vilji seilast langt til að koma höggi á skáldið og ritstjórann Sigmund Erni. Það breytir ekki því að umræddur texti frá því í fyrndinni er frá Tómasi kominn og merktur Sigmundi Erni.
Sjálfur hefur Sigmundur sagt opinberlega að umræða um ritþjófnaði sé eðlileg og nauðsynleg. Hann mun því væntanlega ekki eiga í erfiðleikum með að svara Davíð Oddssyni, ritstjóra Moggans, og meðreiðarsveinum hans …