Icelandair er við það að ná samningum við flugmenn sína. Nánar verður fjallað um væringar og vandamál á íslenskum flugmarkaði í Mannlífi sem kemur út á morgun.
Samkvæmt heimildum Mannlífs kveður samningurinn á um 25 prósenta launalækkun flugmanna og hafa þeir meðal annars gefið eftir frídaga og eru tilbúnir til að auka vinnuframlag
Formaður Félags íslenskra atvinnuflugmanna, Jón Þór Þorvaldsson, hefur áður staðfest að lítið beri á milli í viðræðum við flugfélagið. Stíf fundarhöld hafa staðið yfir í allan dag og fram á kvöldið. Liklegt verður því að teljast að samningur við flugmenn verði tilkynntur á allra næstu dögum. Samkvæmt heimildum Mannlífs kveður samningurinn á um 25 prósenta launalækkun flugmanna og hafa þeir meðal annars gefið eftir frídaga og eru tilbúnir til að auka vinnuframlag. Formaðurinn var bjartsýnn og sagði viðræðurnar ganga vel í samtali við mbl.is um kvöldmatarleytið. Vonir standa til að samkomulag náist í kvöld.
Enn er allt stál í stál á milli Icelandair og flugfreyja. Svo virðist sem þær standi einar eftir gegn flugfélaginu en samkvæmt heimildum Mannlífs eru kröfur Icelandair mun vægari en komið hefur fram í fjölmiðlum, eða nokkuð í anda þess sem flugmönnum hefur boðist. Grunnlaun flugfreyja eru þó talsvert lægri en flugmanna. Þá herma heimildir Mannlífs einnig að stjórn og forstjóri Icelandair hafi nú þegar lækkað laun sín um 30 prósent og allir helstu stjórnendur félagsins um 20 prósent.