Kryddpían og fatahönnuðurinn Victoria Beckham mætti að sjálfsögðu í konunglega brúðkaupið með eiginmanni sínum, David Beckham, og horfði á Meghan Markle og Harry Bretaprins játast hvort öðru.
Sjá einnig: Stjörnurnar fjölmenntu í konunglega brúðkaupið.
Í viðtali við Evening Standard tjáir hún sig um sjálfan brúðarkjólinn og sparar ekki stóru orðin.
„Mér fannst hún vera stórglæsileg,“ segir þessi annálaða stílpía um brúðina. „Mér fannst kjóllinn hæfa henni,“ bætir hún við um kjólinn sem var hannaður af Clare Waight Keller.
„Mér fannst hann vera fullkominn fyrir hana. Og Harry leit vel út.“
Þá segir Victoria að dagurinn í heild sinni hafi verið mjög vel heppnaður, en Meghan og Harry létu pússa sig saman þann 19. maí síðastliðinn.
„Þetta var svo fallegt og ótrúlegt brúðkaup. Þetta var bara frábær dagur. Þau voru svo hamingjusöm og allir samglöddust þeim svo mikið. Meghan virðist vera mjög yndisleg kona sem elskar hann.“
Sjá einnig: Heiðruðu Díönu prinsessu með brúðkaupsmyndunum.
Victoria mætti líka í brúðkaup bróður Harrys, Vilhjálms þegar hann gekk að eiga Kate Middleton árið 2011. Þá var Victoria ólétt af sínu fjórða barni, stúlkunni Harper Seven.
„Í sannleika sagt var mikill léttir að vera ekki kasólétt í þessu konunglega brúðkaupi. Mér fannst gaman að geta klæðst hverju sem ég vildi,“ segir Victoria.