„Við erum gjörsamlega miður okkar yfir þessu atviki. Okkur þykir mjög fyrir því að viðskiptavinir okkar hafi þurft að upplifa þetta og að þeir hafi lent í þessum vandræðum með okkur,“ segir Haukur Herbertsson, rekstrarstjóri Mountaineers of Iceland, í viðtali í Morgunblaðinu í dag. Atvikið sem hann vísar til er ferðin sem fyrirtækið fór í þann 7. janúar með 39 ferðamenn á vélsleðum við Langjökul. Vegna veðurs á leiðinni til baka þurfti að kalla út björgunarsveit sem kom hópnum til aðstoðar.
Fyrirtækið hefur hlotið mikla gagnrýni fyrir að hafa farið með hóp ferðamanna í umrædda ferð þrátt fyrir slæma veðurspá en Veðurstofan hafði gefið út gula viðvörun þennan dag.
Haukur segir þá að of mikið hafi verið gert úr því að Veðurstofan hafi gefið út gula viðvörun daginn sem ferðin var farin.
„Það er ekkert í gulri viðvörun sem gefur til kynna að það skuli afdráttarlaust aflýsa öllum ferðum,“ útskýrir Haukur og tekur fram að planið hafi verið að koma hópnum til baka áður en vont veður myndi skella á.