Forsetaframbjóðandinn og leikkonan Steinunn Ólína Þorsteinsdóttir hafnar því að hún sé að leggja Katrínu Jakobsdóttur fyrrum forsætisráðherra og mótframbjóðanda sinn í einelti.
Hún segist hafa sett fram eðlilega gagnrýni á störf Katrínar, ljóst er að þegar Steinunn Ólína var spá í bjóða sig fram sagði hún hátt og skýrt að hún myndi bjóða sig fram til forseta ef Katrín myndi gera það.
Hins vegar er raunin sú að Steinunn Ólína sagði frá framboði 4. apríl en Katrín degi síðar.
Lík og fram kemur í frétt DV þá var ástæðan fyrir leiðréttingu Steinunnar Ólínu, í færslu á samfélagsmiðlinum Facebook, að hún sé alls ekki að leggja Katrínu í einelti, pistill Kolbrúnar Bergþórsdóttur blaðamanns á Morgunblaðinu er hún skrifaði í blaðið.
Á meðal þeirra er deilt hafa pistli Kolbrúnar er Líf Magneudóttir borgarfulltrúi VG sem styður Katrínu. Og í honum má þetta finna:
„Meðal forsetaframbjóðenda er Steinunn Ólína Þorsteinsdóttir sem virðist eiga það eina erindi í baráttuna að minna á hversu hræðileg Katrín Jakobsdóttir er. Eins og harðgreindur maður, sem hefur sannleikann að leiðarljósi, sagði réttilega þá minnir Steinunn Ólína þessa dagana einna mest á eltihrellinn í Baby Reindeer. Og hún kemst upp með það.“
Kolbrún vísar þarna í vinsæla þáttaröð á streymisveitunni Netflix.
Steinunn Ólína svarar pistli þessum á Facebook. Það sé deginum ljósara að hún hefur oft gagnrýnt Katrínu duglega; segir það lygi að um einelti sé að ræða:
„Nú er blessunin hún Kolbrún Bergþórs kölluð til starfa til að gera lítið úr ástríðu minni fyrir hag lands og þjóðar. Hún bætist þar í hóp svokallaðs mektarfólks í okkar samfélagi sem lýgur því blákalt að ég hafi gengið fram með eineltistilburðum gagnvart fyrrum forsætisráðherra. Þetta er lygi en ef þessir óvitar halda þessum málflutningi áfram trúa þau eflaust að aðrir muni trúa. Í stjórnartíð fyrrverandi forsætisráðherra lagði hún á ráðin, skrifaði, samþykkti og lagði fram lagareldisfrumvarp úr þeirri sjávarútvegsstefnu sem upp er teiknuð og mun eyðileggja til frambúðar lífríki landsins. Stefnu sem gefur áfram auðlindir, eyðileggur atvinnumöguleika, rústar vistkerfum og vegur að mannréttindum fólks og sjálfstæði Íslendinga.“
Einnig:
„Í stjórnartíð fyrrverandi forsætisráðherra var í stað þess að nýta virkjunarkosti sem samþykktir eru og eru grænir og hreinir lagði hún á ráðin með ríkisstjórn sinni að setja af stað gullgrafaraæði í vindmyllurekstri, sem mun eyðileggja fuglalíf, valda landraski og náttúruspjöllum, eyðileggja ásjónu landsins, skapa engin störf og bara eyðileggingu til frambúðar. Ekkert gerði hún til sporna við sumpart tilbúnum orkuskorti með skynsamlegum lausnum til að koma í veg fyrir vindmylluarðránið fyrirætlaða.“
Og að lokum þetta:
„Fyrrverandi forsætisráðherra ber pólitíska ábyrgð á frumvörpum þeim sem samin voru og lögð eru fram í hennar stjórnartíð og getur ekki vikist undan að hafa ætlað að framselja, leigja, gefa og sumt um aldur og ævi íslenskar náttúruauðlindir til útlendinga og bestu vini þeirra sem eiga og ráða í okkar samfélagi.“