„Ekki er það svo til marks um heilbrigt þjóðfélag þegar þegnar þess eru farnir að hafa auga með nágranna sínum til að kanna hvort hann sé hugsanlega að fara á svig við tilmæli eða reglur yfirvalda,“ segir Kolbrún Bergþórsdóttir blaðamaður í leiðara í Fréttablaðinu. Hún heldur fram að aðeins lítið brot af tilkynningum um hugsanleg brot á sóttvarnarlögum hafi átt við rök að styðjast.
„ … margir eru að klaga náungann og tilkynna hann til yfirvalda án þess að nokkur ástæða sé til. Þetta getur ekki verið gott,“ bætir Kolbrún við og tekur fram að hún sé ekki með þessu að afsaka brot Bjarna Benediktssonar. Hún gagnrýnir hins vegar hluta stjórnarandstöðunnar sem krafðist.
„Viðbrögð hluta stjórnarandstöðunnar, sem krefst afsagnar ráðherra, eru þó ekki trúverðug og reyndar hræsnisfull, einfaldlega vegna þess að flestir vita að ef þeir þingmenn væru í sporum fjármálaráðherra myndu þeir aldrei taka í mál að segja af sér.“
Kolbrún bætir við að í stjórnmálum á Íslandi tíðkist það ekki að ráðherrar segi af sér og skipti þá flokkurinn engu máli.
„Ef þeir segja af sér er alveg víst að þeir hafa verið þvingaðir til þess,“ segir Kolbrún og bætir við:
„Við skulum einnig vona að á nýju ári temji fólk sér meiri hófstillingu í þjóðfélagsumræðunni. Vonandi sjá netsóðarnir svo að sér og taka upp nýja og betri siði. Það yrði mikil blessun.“