Framkvæmdastjóri og stjórnarformaður Samtaka verslunar og þjónustu eru ekki hrifin af nýjustu auglýsingu VR.
Ný auglýsing frá stéttarfélaginu VR fer fyrir brjóstið á Andrési Magnússyni, framkvæmdastjóra Samtaka verslunar og þjónustu og Margréti Sanders stjórnarformanns SVÞ. Að þeirra mati er auglýsingin ekki í takt við raunveruleikann.
Í auglýsingunni má sjá Georg Bjarnfreðarson, karakter sem birtist fyrst í Næturvaktinni, sem verslunareiganda sem fer heldur illa með starfsmann sinn. Í auglýsingunni er fólk minnt á að kynna sér réttindi sín í desember. Þau Andrés og Margrét segja skilaboð auglýsingarinnar vera „alvarlega árás á atvinnurekendur“. Þetta segja þau í aðsendri grein sem birtist í Morgunblaðinu í dag.
„Þær sjónvarpsauglýsingar frá VR sem birtast þessa dagana eru að mati SVÞ fjarri öllum raunveruleika um það hvernig vinnuveitendur umgangast starfsfólk sitt. Það handrit að mannlegum harmleik sem sett er á svið á kómískan en um leið gildishlaðinn hátt er verulega vandmeðfarið og ekki til þess fallið að gera gaman að. Við þekkjum a.m.k. ekki þann vinnuveitanda sem vill misbjóða starfsfólki sínu á þann veg sem þar er lýst. Þó að mörgum þyki þessar auglýsingar með þeim hætti að þær nái að kitla hláturtaugar hjá fólki er undirtónn þeirra og þau skilaboð sem þær senda mjög alvarleg árás á atvinnurekendur almennt,“ segir meðal annars í pistlinum.
Pistil Andrésar og Margrétar má lesa í heild sinni á vef SVÞ.