Heimildarmyndin Fólkið í Dalnum verður frumsýnd síðar í þessum mánuði. Myndin fjallar um Þjóðhátíð í Vestmannaeyjum og sögu hátíðarinnar.
Í ár eru 145 ár liðin frá því Þjóðhátíð í Vestmannaeyjum var fyrst haldin í Herjólfsdal. Í júlí verður heimildarmyndin Fólkið í Dalnum frumsýnd, en það eru Eyjapeyjarnir Sighvatur Jónsson og Skapti Örn Ólafsson sem standa að myndinni.
Hugmyndin að myndinni kviknaði árið 2013. Að þeirra mati er löngu kominn tími til að skrásetja sögu Þjóðhátíðar, sem þeir segja „magnaða“, í formi heimildarmyndar. Þeir hófust handa við gerð myndarinnar árið 2014.
Undanfarið fimm ár hafa þeir Sighvatur og Skapti Örn tekið á annað hundrað viðtöl við fólk sem tengist hátíðinni með einum eða öðrum hætti og ætla má að annað myndefni telji nokkra tugi klukkutíma.
Saga Þjóðhátíðar í nútíð og fortíð
Hugmyndin er að segja sögu Þjóðhátíðar í gegnum upptökur síðustu ára. Fylgst hefur verið með tveimur fjölskyldum við hátíðahaldið, allt frá undirbúningi að frágangi. Fjallað verður um hefðirnar, tónlistina, lífið í hústjöldunum, sjálfboðaliðana og öryggismálin. Eyjamenn gera sér grein fyrir hversu mikið verk er að halda Þjóðhátíð sem er stærsta fjáröflun ÍBV íþróttafélags.
Tilgangurinn með útgáfu myndarinnar er að miðla sögu Þjóðhátíðar í nútíð og fortíð til stærri hóps en áður, innan lands sem utan að sögn Sighvats og Skapta.
Söfnun í fullum gangi
Öllum upptökum er lokið og eftirvinnsla myndarinnar stendur yfir.
„Á endasprettinum við framleiðslu heimildarmyndarinnar leitum við nú eftir stuðningi í gegnum hópfjármögnunarsíðuna Karolina Fund. Þar verður hægt að styðja við bakið á okkur gegn því að fá meðal annars miða á forsýningu myndarinnar ásamt því að fá nafnið sitt í kreditlista hennar. Við stefnum á að forsýna Fólkið í Dalnum í Eyjum og í Reykjavík núna í júlí, en nánari upplýsingar liggja fljótlega fyrir. Við hvetjum alla unnendur Þjóðhátíðar til að leggja okkur lið,“ segir Skapti Örn.