Selma Björnsdóttir er handhafi margra titla. Hún er ein okkar besta söngkona, frábær leikkona og þá hefur hún raðað sér á bekk með okkar bestu leikstjórum. Selma er líka athafnarstjóri hjá Siðmennt og nú hefur komið í ljós að hún kann listina að segja góða sögu.
Selma segir frá því á Facebook að hún hafi skellt sér í Álftaneslaug. Hún fór svo í heitan pott og lá þar í mestu makindum þegar draumaprinsinn ákvað að láta til skarar skríða. Við gefum Selmu orðið:
„Ég lá í mestu makindum í heita pottinum í Álftaneslauginni þegar sirka 3 ára prins fikraði sig hægt í áttina að mér, settist við hlið mér, lyfti handleggnum á mér upp á yfirborð vatnsins og kyssti mig létt á handarbakið.“ Selma segir að strákurinn hafi síðan fikrað sig aftur til föður síns. Aðspurð hvernig pabbi drengsins hafi tekið uppátæki sonar síns, svarar Selma: „Hann varð bara vandræðalegur hahahahaha. Þetta er greinilega ekki eitthvað sem sonur hans gerir reglulega. […] Klárlega hápunktur vikunnar hjá mér,“ bætir Selma við en þessi jákvæða og skemmtilega frásögn hefur vakið mikla lukku á Facebook-síðu hennar. Þá bendir Selma á að það séu litlu hlutirnir sem skipti máli og útskýringin er einföld.
„Hann fékk mig til að brosa hringinn þessi litli draumaprins.“