Sigrún Sía Benediktsdóttir fer ekki fögrum orðum yfir leiksýninguna um Gosa sem sýnd er í Borgarleikhúsinu um þessar mundir. Óánægju sína lætur hún í ljós í fjölmennum hópi á Facebook sem gengur undir nafninu Auðveldar mömmur.
Margir meðlimir hópsins hafa tekið undir með Sigrúnu og segja lítið hafa verið í sýninguna lagt.
Hulda nokkur segist hafa orðið fyrir miklum vonbrigðum með sýninguna en telur það vera vegna samanburðar á eldri leiksýningu sem aðgengilega er í sjónvarpinu og fjallar um ævintýri Gosa. ,,Varð fyrir miklum vonbrigðum sjálf þar sem við höfum verið að horfa á gamla leiksýningu í sjónvarpinu sem er æðisleg (þar sem Sveppi leikur Tuma). Fannst lítið lagt í þessa,“ segir hún.
Karólína Helga tekur í sama streng og segir, „við fórum í dag, ég varð hrikalega svekkt. Á tímabili fannst okkur þetta líka frekar mikil sýra.“ Þá segir hún það einnig hafa verið auðsjáanlegt að gætt hafi verið sparnaðar í sýningunni. ,,Það var bara svo margt sem öskraði sparnaður, sem er svo ólíkt þeim barnasýningum sem ég hef farið á í Borgarleikhúsinu,“ segir Karólína.
Þá voru nokkrar mæður sem sögðust hafa sofnað í miðri sýningu, svo leiðinleg hafi hún verið.
Anika segir að dóttir hennar hafi skemmt sér vel en að hún sjálf hafi átt erfiðleikum með að halda augunum opnum. ,,Mín átta ára skemmti sér vel en ellefu ára fannst þetta ekkert sérstakt. Ég sofnaði yfir þessu, um miðjan part.“
Yrsa hrósar leikurunum en segist hafa verið að sofna í lok sýningarinnar. ,,Ég fór með minn sex ára á þessa sýningu í janúar. Honum fannst þetta svona la-la. Ég var að sofna undir lokin.“