„Ég sá það bara á Facebook að ég væri það sko. Ég er ekki lögmaður þeirra,“ sagði Sigurður G. Guðjónsson hæstarréttarlögmaður í viðtali við Mannlíf.
Mennirnir sem um ræðir eru þeir sem Vítalía Lazareva talaði um í podcast þættinum Eigin konur á þriðjudag.
Í þættinum lýsir hún ítarlega þeim atvikum sem áttu sér stað í sumarbústað og í golfferð þar sem hún hitti mennina með þáverandi ástmanni sínum. Mennirnir eru allir vel þekktir og valdamiklir í þjóðfélaginu.
„Það er nú bara algjör misskilningur,“ bætti Sigurður við en var hann sagður lögmaður mannanna í umræðu á samfélagsmiðlum í kjölfar viðtalsins.
„Það eru aðrir lögmenn sem sjá um þessi mál sko,“ sagði Sigurður en ekki liggur fyrir hverjir séu lögmenn mannanna.
Enginn þeirra sem komu við sögu í sumarbústaðnum eða golfferðinni hafa tjáð sig um ásakanar um kynferðisbrot gagnvart Vítalíu eða að hafa farið langt yfir hennar mörk. Þjóðþekktur fjölmiðlamaður sem sakaður er um að hafa misboðið henni í umræddri golfferð sagði við Mannlíf að hann hefði ekki tíma til þess að ræða málið.