Ef þig langar í hina íslensku fálkaorðu þá getur þú skeltt þér inn á brask og brall og keypt þér eina. Svo fremi sem þú getur reitt fram 90 þúsund krónur sem er uppsett verð seljanda.
Það er Sigurður nokkur sem auglýsir orðuna til sölu á sölusvæðinu brask og brall á Facebook. Auglýsingin hljóðar svo: „Hver vill ekki fá Fálkaorðu á nýju ári. Þessi er jafnvel betri en sú sem Guðni Th er með, þarft ekkert að gera annað en borga kr. 90.000 og þú hefur eignast Fálkaorðu!!!!!,“ segir Sigurður.
Friðjón bendir hins vegar á að Sigurði er ekki heimilt að selja orðuna. „Þessi orða er eign íslenska ríkisins og er óheimilt að selja hana eða kaupa. Ef svo er gert heitir það þjófnaður,“ segir Friðjón ákveðinn.
Sigurður segir Friðjón bara ekki vita um hvað hann talar. „Nei. Hún er mín eign. Þú bara veist ekki betur,“ segir Sigurður.
Friðjón segist hins vegar víst alveg vita um hvað hann talar. „Hún getur ekki verið þín eign þar sem orðan er veitt fólki til vörslu og notkunar en samkvæmt lögum um Fálkaorðuna ber að skila henni henni til íslenska ríkisins við andlát þess sem var sæmdur henni. Þannig getur orðan aldrei orðið eign neins nema íslenska ríkisins. Ef henni hefur ekki verið skilað til rétts eiganda er hún einfaldlega stolin hvað svo sem þú segir um það,“ segir Friðjón.
Þá bendir Sigurður á að orðan hans sé svo gömul að núgildandi lög um Fálkaorðuna eigi einfaldlega ekki við. „Er eitthvad ad hjá þér ? Þessi orda var veitt á támabilinu 1921-1944 og tengist á engan hátt þeim lögum sem í gildi eru í dag,“ segir Sigurður.