Sigurjón Sighvatsson, kvikmyndaframleiðandi, hefur verið skipaður formaður nýs átta manna kvikmyndaráðs sem Lilja Alfreðsdóttir, mennta- og menningarmálaráðherra skipaði nýlega. Varaformaður ráðsins er Margrét Örnólfsdóttir.
Auk Sigurjóns og Margrétar sitja Anna Þóra Steinþórsdóttir, Ragnar Bragason, Lilja Ósk Snorradóttir, Lilja Ósk Diðriksdóttir, Birna Hafstein og Bergsteinn Björgúlfsson í ráðinu. Ráðherra skipar kvikmyndaráð til þriggja ára í senn. Formaðurinn er skipaður án tilnefningar en hinir sjö eru skipaðir samkvæmt tilnefningum.
Sigurjón tekur við af Áslaugu Maríu Friðriksdóttur, sem var formaður ráðsins frá 2016 til 2019.
Samkvæmt kvikmyndalögum skal kvikmyndaráð vera stjórnvöldum og Kvikmyndamiðstöð Íslands til ráðgjafar um málefni kvikmynda. Ráðið gerir jafnframt tillögur til ráðherra um stefnu og markmið opinberra aðgerða á sviði kvikmyndalistar.