Listamaðurinn Símon Birgisson mælir með að Einar Kárason fari í sporavinnu. Tilefni ummælana er gagnrýni Einars á Kára Stefánsson, forstjóra Íslenskrar erfðagreiningar.
Í færslu sem Einar birtir á Facebook segir rithöfundurinn að sér þyki hreinlega asnalegt af Kára Stefánssyni, forstjórar Íslenskrar erfðagreiningar, að ætlast til þess að fá hrós fyrir framlag hans til baráttunnar gegn útbreiðslu COVID-19 á Íslandi – en þar vísar Einar til viðtals við Kára í sjónvarpsþættinum Kastljósi í vikunni sem skapaði heitar umræður í vikunni. Enn furðulegra þykir Einari að á sama tíma og Kári krefjist þess að fá hrós þá hrósi hann sjálfur aldrei eigin starfsólki.
„Enginn sem ég spurði mundi nafn nokkurs manns úr hans starfsliði. Enda aldrei á það fólk minnst! En þegar KS fær ekki nógu mikla gloríu fyrir það sem gert var, þá birtist hann og þykist voða sár yfir því að hans samstarfsfólki sé ekki þakkað nóg!“
Áhugaverðar umræður hafa skapast við færslu Einars en þar er tekist á um réttmæti gagnrýni hans á Kára. Einn þeirra sem leggur orð í belg er listamaðurinn Símon Birgisson. „Mæli með sporunum Einar Kárason,“ skrifar Símon og taggar rithöfundinn. „Hjálpa manni að sigrast á gremju, öfund og afbrýðisemi.“
Annar sem tekur til máls er tónlistarmaðurinn Bubbi Morthens sem segir rithöfundinn einfaldlega þurfa á faðmlagi að halda. „Einar minn þú þarft knús.“
„Nú kemur Kári og lemur þig,“ segir útgefandinn Jóhann Páll Valdimarsson aðvarandi við Einar.
Aðrir kunna Einari bestu þakkir fyrir færsluna. Þeirra á meðal er Svavar Gestsson, fyrrverandi þingmaður og faðir Svandísar Svavarsdóttur heilbrigðisráðherra, sem er á meðal þeirra sem Kári gagnrýndi harðlega í fyrrnefndu viðtali. „Þakka þér Einar fyrir drengilegt viðbragð,“ skrifar Svavar, ánægður með að rithöfundurinn skuli taka upp hanskann fyrir Svandísi dóttur sína.