Fernando Jorge útskrifaðist frá Central Saint Martins-skólanum í London árið 2010. Síðan þá hefur hann bókstaflega þotið upp á stjörnuhimininn.
Hann þykir einn frumlegasti og flottasti skartgripahönnuðurinn á markaðnum í dag.
Beyoncé og Michelle Obama eru meðal aðdáenda hans en gripir hans eru sagðir geisla af orku og persónuleika. Fernando fæddist og ólst upp í Brasílíu.
Amma hans var mikill fagurkeri og hann segir að vegna áhrifa hennar hafi hann valið sér skapandi starf.
Nýjasta lína hans heitir Flame, eða Logi, og hann segir að þar sé hann að leitast við að skapa tilfinningu fyrir hreyfingu, krafti og sjálfstrausti. Í hvert sinn sem hann sest niður til að skapa treystir hann á tilfinningu sína fyrir efninu, innsæi og til mótvægis á þrotlausa vinnu sína við endurbætur allt þar til hann nær fram þeim áhrifum sem hann sækist eftir.
