Jónas Óli Jónasson, einn eigenda skemmtistaðarins B5, segir mikilvægt að ríkisvaldið aðstoði skemmtistaðaeigendur að semja við leigusala. Hann segir húsaleiguna erfiðasta rekstrarliðinn og til að mynda hafi lokunarstyrkur hins opinbera aðeins dugað fyrir ríflega hálfs mánaðar leigu.
„Leiguaðilar sem leigja út húsnæði í miðbænum eru missveigjanlegir í samskiptum. Okkar barátta hefur líka verið í því að fá leiguna niður, því það er einn stærsti kostnaðarliðurinn þegar er lokað. Það er ekkert mál fyrir okkur ef yfirvöld myndu koma og styðja við bakið á okkur að tala við leiguaðilana,“ sagði Jónas Óli í útvarpsþættinum Bítinu í morgun.
Aðspurður segir Jónas Óli það ljóst að skemmtistaðurinn komi ekki til með að opna á meðan tveggja metra reglan sé í gildi. Slíkt hafi eðlilega alvarleg áhrif á reksturinn enda staðurinn verið lokaður frá miðjum mars og kallar eigandinn eftir frekari aðstoð hins opinbera.
Líkt og Mannlíf greindi frá reyndust tveir af sex veitingastöðum ekki uppfylla kröfur um sóttvarnir í eftirliti lögreglunnar á höfuðborgarsvæðinu í gærkvöldi. Á báðum stöðunum var ekki mögulegt að virða tveggja metra regluna og var eigendum þeirra gert að færa í sundur borð. Staðan var enn verri á laugardagskvöldið þegar mun fleiri staðir uppfylltu ekki kröfur um sóttvarnir. Lögreglan hefur boðað að þeir staðir sem ekki virða fjölda- og fjarlægðartakmarkanir verði sektaðir eða þeim jafnvel lokað.
Sjá einnig: „Fólk er ekkert öruggara á veitingastöðum en á skemmtistöðum og krám“