Samiðn, landssamband fagfólks í iðnaði, hvetur stjórnvöld til að hraða innviðauppbyggingu á þeim óvissutímum sem blasa við. Sambandið hvetur stjórnvöld til að setja í gang mannaflsfrekar framkvæmdir til að stuðla að atvinnusköpun fagfólks í iðnaði. Þetta kemur fram í tilkynningu frá Samiðn.
„Á tímum samdráttar er mikilvægt að stjórnvöld horfi til verkefna sem stuðla að atvinnusköpun sem flestra. Ljóst er að mörg verkefni koma þar til greina, bæði á sviði samgöngumála og mannvirkjagerðar. Nú er uppi fordæmalaust ástand í samfélaginu með mikilli ágjöf á atvinnulífið og nauðsynlegt að stjórnvöld bregðist hratt við. Hagvaxtahorfur hafa versnað til muna og telur Samiðn mikilvægt að framkvæmdir hefjist þegar í stað. Verulega hefur skort á viðhaldsframkvæmdir hjá hinu opinbera síðustu misserin og nú er lag að bregðast við uppsafnaðri þörf þar. Brýnt er að halda hjólum atvinnulífsins gangandi og stuðla að því að greiðslur úr ríkissjóði skili mikilvægum virðisaukandi verkefnum til samfélagsins. Það er á svona tímum sem reynir á stjórnvöld að styðja við af fullu afli og ljóst er að enginn hörgull er af verðugum verkefnum sem ráðast þarf í,“ segir meðal annars í tilkynningunni og eru stjórnvöld svo hvött til að hraða innviðauppbyggingu og setja af stað „mannaflsfrekar framkvæmdir“ eins fljótt og unnt er.