Skrímsladeild Moggans og Sjálfstæðisflokksins hefur undanfarin misseri einbeitt sér að því að gera frambjóðendur Samfylkingar tortryggilega. Þórður Snær Júlíusson, frambjóðandi og fyrrverandi kvenhatari, fékk að finna til tevatnsins þegar Stefán E. Stefánsson, blaðamaður Moggans, leiddi hann í gildru og fletti ofan af hatursskrifum hans í garð kvenna. Þórður Snær er búinn að vera pólitískt.
Dagur B. Eggertsson hefur einnig fengið að finna fyrir því að hann er í flokki sem ógnar Sjálfstæðisflokknum. Allt mögulegt klúður í Reykjavík er af Skrímsladeild Moggans skrifað á Dag sem kúrir í öðru sæti á lista Samfylkingar í Reykjavík. Þá var mikið gert með það að Kristrún Frostadóttir formaður ráðlagði kjósanda í Grafarvogi að kjósa frekar flokkinn og strika frekar yfir Dag „aukaleikara“ ef honum hugnaðist svo, fremur en að snúa baki við flokknum.
Kannnanir benda til þess að Samfylking sé að missa flugið á seinustu metrunum og endi hugsanlega í fylgi sem er neðan við 18 prósent. Aftur á móti er Viðreisn á fleygiferð og gæti orðið stærsti flokkurinn eftir kosningar. Skrímsladeildin hrökk upp þessa martröð og hefur þegar lagt upp í herferð þar sem Þorgerður Katrín Gunnarsdóttir er í skotlínu skrímslanna.
Mogginn sló því upp í vikunni að Þorgerður Katrín vissi ekki hvort hún myndi setja sem skilyrði fyrir stjórnarþátttöku að þjóðin fengi að kjósa um aðildarviðræður að Evrópusambandinu. Þessar fréttir voru byggðar á viðtali Stefáns E. við hana í spursmálum. Þess er beðið að skrímslin geri betur og finni vænlegt fórnarlamb innan Viðreisnar.
Vandi skrímslanna er sá að Sjálfstæðisflokkurinn er í tómu tjóni og mælist við mörk sem aldtrei hafa sést áður og er á stundum þriðji stærsti flokkur landsins. Skítkastið þarf því að fara víða til að bjarga Bjarna Benediktssyni og hirð hans frá þeirri niðurlægingu sem virðist vera að raungerast …