Þórólfur Guðnason sóttvarnarlæknir segir að fjórir þeirra sem hafa nú greinst með COVID innanlands tengist allir sama manninum sem kom frá útlöndum á dögunum. Sá maður framvísaði neikvæðu PCR vottorði við komuna til landsins og greindist neikvæður í fyrri skimun en svo jákvæður í þeirri síðari. Þá var orðið of seint og var maðurinn búinn að smita fólk sem bjó í sama stigagangi og hann af breska afbrigði COVID.
RÚV greinir frá þessu. Þórólfur segir of snemmt að tala um fjórðu bylgju COVID. „Nei, ég held að það sé nú of snemmt að segja það en ef við færum að sjá mikið af fólki sem að við getum ekki tengt við önnur tilfelli þá væri það merki um að veiran væri komin víðar í samfélagið og við myndum hafa miklu meiri áhyggjur af því. Þannig að ég er nú að vonast til þess með þeim aðgerðum sem við erum að grípa til að þá muni okkar takast að stoppa þetta svona í fæðingu,“ segir Þórólfur.
Hann segist ekki sjá fram á að reglur verði slakaðar úr þessu. „Það sýnir bara hvað þetta getur verið viðkvæmt ástand og ég er bara svona að hugsa hvað væri skynsamlegt að gera. Og svo náttúrulega það sem gerist núna á næstunni mun náttúrulega ráða miklu um það hvaða tillögur ég kem með. Ég held alla vega að það séu kannski minni líkur núna en áður að það verði eitthvað slakað frekar á.“