Íbúar í Árneshreppi á Ströndum vöknuðu upp við það í morgun að snjór var niður í byggð og fjallstindar snjóhvítir. Þetta gerist í framhaldi af veðurblíðu undanfarna daga. En nú er kuldinn mættur með snjókomu og sudda. Sumum brá þó í bræun í morgunsárið þegar fannhvít jörð blasti við.
„Þetta er þó alls ekki óvenjulegt á þessum árstíma. Við fáum svona glaðning að jafnaði á hverju sumri. Vonandi er sumarhretið nú að baki og góð tíð framundan. Það spáir samt áframhaldandi norðanátt í nokkra daga en svo lagast þetta,“ segir Guðrún Gunnsteinsdóttir, sem dvelur á æskuslóðum sínum í Norðurfirði þessa dagana.
Hún spáir betri tíð og blómum í haga.
„Þetta verður gott sumar þegar hretinu slotar. Ég lofa því en það er með þetta eins og kosningaloforðin. Ég segi þetta í góðri trú,“ segir Guðrún.