Páll Vilhjálmsson sögukennari við FG í Garðabæ birti á bloggi sínu færslu sem er falsfrétt.
Þar segir Páll meðal annars:
„Lögreglan rannsakar eitrun Páls skipstjóra Lögreglan fékk lífssýni af Páli Steingrímssyni skipstjóra hjá Samherja í tengslum við rannsókn á lífshættulegu tilræði þegar síma Páls var stolið 4. maí í vor. Síma Páls var stolið þegar hann lá í öndunarvél á gjörgæslu. Rannsókn lögreglu beinist m.a. að því að greina ástæður skyndilegra lífshættulegra veikinda skipstjórans. Í tölvupósti til Páls er hann beðinn um lífssýni til að ,,finna út hvort þú hafir orðið fyrir eitrun.“ Með tölvupósti er Páll einnig beðinn um heimild að tæknideild lögreglunnar afli upplýsinga hjá fjarskiptafyrirtækjum um ,,hvar síminn var á meðan þú varst meðvitundarlaus“. Þær upplýsingar staðfesta að sími Páls fór um hendur starfsmanna RÚV sem stálu úr símanum gögnum. Þau gögn voru notuð af RÚV, Stundinni og Kjarnanum í fjölmiðlaherferð gegn Samherja.“
Einnig að „rannsókn málsins er langt komin. Páley Borgþórsdóttir lögreglustjóri á Norðurlandi eystra fer með forræði rannsóknarinnar. Hún hefur verið í Reykjavík alla þessa viku. Búið er að yfirheyra starfsmenn RÚV, Stundarinnar og Kjarnans. Efnisatriði í drög að skýrslu liggja fyrir. Atburðarásin, með tímalínum og atvikalýsingum, er kunn. Andleg vanheilsa grunaðra hefur verið rannsökuð og læknisvottorð metin.
Fjölmiðlar þegja sem gröfin. Samfélag blaðamanna er fámennt. Menn eru vinir, kunningjar og samstarfsmenn, núverandi, fyrrverandi eða verðandi. Í vina- og hagsmunatengslum vill gleymast að starf blaðamanna er að upplýsa almenning um mikilsverð mál.“
Og þá segir Páll að Rakel Þorbergsdóttir, sem nýlega tilkynnti að hún væri að hætta sem fréttastjóri RÚV, sé á leið í afplánun:
„Ekki verða fréttamálin öllu stærri en þegar ríkisfréttastofa er bendluð við banatilræði og þaulskipulagðan gagnastuld frá manni sem liggur meðvitundarlaus í öndunarvél. Sá sem ekki sér fréttina, tja, hann er ekki blaðamaður heldur hagsmunavörður.
Á Efstaleiti er aftur það að frétta að fréttastjórinn Rakel hættir, sumir vilja í langt námsleyfi á meðan aðrir huga að nýjum vettvangi. Varla þó blaðamennsku. Afplánun telst ekki atvinna.
Stefán útvarpsstjóri getur ekki ráðið fréttastjóra með aðsetur á Litla-Hrauni eða Kvíabryggju. Þess vegna bíður hann með að auglýsa starfið.“
Hvaða gögn sögukennarinn hefur undir höndum til að styðja við fullyrðingar sínar kemur ekki fram í færslunni, en líklega verður Páli ekki skotaskuld úr því að birta þau, enda eru skrif hans, og ásakanir, af alvarlegri gerðinni.
Aðalsteinn Kjartansson blaðamaður á Stundinni ritar grein á vefsíðuna þar sem þetta kemur meðal annars fram:
„Af mörgum ástæðum les ég almennt ekki bloggsíðu Páls Vilhjálmssonar og sá því ekki bloggpistil sem hann tileinkaði mér. Það var ekki fyrr en dyggur lesandi Páls sendi mér hann í tölvupósti að ég vissi að sú samsæriskenning væri nú komin fram að ég væri glæpamaður sem hefði tekið þátt í eða framkvæmt tiltölulega flókinn stuld á farsíma norður á Akureyri.
Glæpurinn – sem ég er sagður hafa framkvæmt – á meðal annars að hafa falið í sér að koma sjómanni í slíkt ástand að hann þurfti á öndunarvél á sjúkrahúsi að halda. Páll gengur svo langt að tala um „banatilræði“. Allt til þess að ég gæti flutt fréttir af skæruliðadeild Samherja.
Þetta er lygi.
Ég hef aldrei tekið þátt í að stela farsíma, stela gögnum eða orðið valdur þess að einhver hafi þurft að tengjast öndunarvél til að lifa. Og mér finnst grafalvarlegt að vera sakaður um það. Í ofanálag fullyrðir Páll að ég hafi verið yfirheyrður vegna rannsóknar lögreglu á þessum glæp. Það er líka lygi.“
Líklegt má telja að færsla Páls muni hafa einhverjar afleiðingar í för með sér.