Charlotte Awbery, konan sem sló í gegn þegar hún sýndi sönghæfileika sína í myndbandi sem tekið var á lestarstöð í London fyrr í mánuðinum, tók lagið í spjallþætti Ellen DeGeneres í gær.
Awbery söng lagið Shallow eftir Lady Gaga, sama lag og hún var beðin um að botna í myndbandinu sem hefur farið sem eldur um sinu á samfélags- og fréttamiðlum undanfarið.
Awbery hefur starfað sem söngkona undanfarin ár og þá tekið að sér að syngja í brúðkaupum, á pöbbum og ýmsum skemmtunum svo dæmi séu tekin. Hún segir pabba sinn hafa gefið sér ráð á sínum tíma og það hafi verið að gefast aldrei upp á söngnum. „Hann hafði rétt fyrir sér,“ sagði hún við Ellen.
Ellen gladdi Awbery eftir flutning hennar í þættinum með árspassa í lestina í London og ávísun upp á 10.000 pund, um 1,6 milljón króna. „Er þér alvara,“ spurði Awbery þegar hún fékk ávísunina afhenta.
Flutning hennar hjá Ellen má sjá hér fyrir neðan.