Jökull Júlíusson, söngvari hljómsveitarinnar Kaleo, prýðir forsíðu helgarblaðsins Mannlífs að þessu sinni. Jökull hefur búið í Bandaríkjunum undanfarin ár á milli þess sem hljómsveitin þeytist um allan heim á tónleikaferðalögum. Hann viðurkennir að rokkaralífið geti verið mjög einangrandi og að hann sakni Íslands. Vinsældir hljómsveitarinnar og verkefnin erlendis geri þó ekki líklegt að hann komist heim á næstunni.
Snjóflóðin sem féllu á Flateyri á þriðjudagskvöld vöktu ónotatilfinningu hjá mörgum sem upplifðu hamfarirnar sem riðu yfir þorpið 1995 með skelfilegum afleiðingum. Sorgin situr eftir en einnig sá mikli samhugur sem ríkti meðal þjóðarinnar á þessum erfiðustu tímum. Í Mannlíf er rætt við unga konu, Sóleyju Eiríksdóttur, sem bjó á Flateyri þegar snjóflóð féll á Flateyri aðfaranótt 26. október 1995. Hún var 11 ára gömul, varð sjálf undir flóðinu og missti 19 ára systur sína og 14 ára frænku.
Í blaðinu er einnig að finna umfjöllun um manndráp á Íslandi, en fregnir bárust í vikunni af manndrápsmáli á Spáni þar sem Íslendingar áttu í hlut. Rætt er við afbrotafræðing sem segir manndráp oftast framin af vini eða ættingja. Rýnt er að auki í átta manndrápsmál sem upp hafa komið allra síðustu ár, eða frá árinu 2016. Til viðbótar er fjallað um eitt mál þar sem gerandinn var dæmdur fyrir stórfellda líkamsárás sem leiddi til dauða þolandans.
Þá er fjallað um mál Donald Trump Bandaríkjaforseta, en ákærurnar gegn honum og meðferð málsins í þinginu endurspeglar nýjan raunveruleika og hina miklu sundrung sem ríkir í bandarísku samfélagi og stjórnmálum. Niðurstaðan virðist fyrir fram gefin en málið gæti þó reynst afdrifaríkt til lengri og skemmri tíma.
Í blaðinu er einnig að finna fjölbreytta umfjöllun um menningu, tísku, mat og hönnun. Allt þetta og miklu meira.
Þú getur alltaf lesið blaðið í heild sinni á vefnum.
Lesa Mannlíf