Sóttkví, einangrun og samkomubann víða um lönd virðist hafa haft mikil áhrif á sölu kynlífsleikfanga. Kanadamenn eru efstir á blaði yfir þau lönd þar sem söluaukningin hefur orðið mest síðustu vikurnar, en þar hefur netsala á kynlífsleikföngum aukist um 135 prósent.
Í Bandaríkjunum hefur salan aukist um sjötíu og fimm prósent og um sextíu prósent á Ítalíu. Í Hong Kong hefur salan aukist um sjötíu og eitt prósent en Bretar eru lengur að taka við sér, enda styttra síðan fólk var hvatt til að einangra sig þar, og þar var aukningin þrettán prósent milli mánaða. Seljendur telja engan vafa leika á því að sóttkví og einangrun eigi stóran þátt í þessari söluaukningu.
Talskona kynlífsleikfangaframleiðandans Womanizer segir í viðtali við CNN að þessi söluaukning hafi komið á óvart en kannanir hafi leitt í ljós að þegar fólk sjái fram á að verja miklum tíma heima við, annað hvort eitt með sjálfu sér eða með maka, þá leiti það leiða til nýta tímann sem best.
Búist er við að eftirspurnin eftir kynlífsleikföngum eigi enn eftir að aukast á næstu vikum.