Jarðskjálfti 4,0 að stærð mældist klukkan 19.10 í kvöld í norðausturrima öskju eldfjallsins Kötlu. Nokkrir eftirskjálftar hafa fylgt í kjölfarið en Veðurstofa segir ekki merki um gosóróa.
Þetta er stærsti skjálftinn í Kötlu síðan 2017. Veðurstofan mun fylgjast grannt með gangi mála í nótt og fylgjast meðal annars með vatnamælum í Mýrdalsjökli. Engin merki eru um gosóróa.
Þegar fréttastofa RúV ræddi við Einar Hjörleifsson á Veðurstofunni var annar skjálfti að ríða yfir.
„Hann gæti verið eftirskjálfti,“ segir Einar.
Ekki er óvenjulegt að svo stórir skjálftar verði í Kötlu, það urðu skjálftar af þessari stærð 2012 og svo aftur 2016 og 2017.
„Við vöktum þetta vel í alla nótt, fylgjumst með vatnamælum í Mýrdalsjökli og jarðskjálftamælum.“
Hann tekur samt fram að engin merki séu um gosóróa. Vakthafandi náttúruvársérfræðingur hjá Veðurstofu Íslands segir í samtali við fréttastofu að jarðskjálftar mælist í Kötlu-öskjunni endrum og eins en lítil virkni hafi verið síðustu fjögur ár.