Stefán Eiríksson útvarpsstjóri er hættur við að hætta og hefur óskað eftir því við stjórn RÚV að vera ráðinn áfram. Hann lýsti yfir því á Bylgjunni fyrir tæpu ári, 1. nóvember 2023, að hann myndi hætta sem útvarpsstjóri þegar fimm ára ráðningartíma hans lýkur. Hann sagðist þá hafa hugsað sér starf útvarpsstjóra sem fimm ára
verkefni.
„Ég hef verið um það bil fimm til tíu ár á hverjum stað. Mér finnst það hæfilegt og eðlilegt fyrir stjórnanda; bæði fyrir viðkomandi sjálfan og ekki síður fyrir viðkomandi stofnun eða rekstur,“ var haft eftir Stefáni í kjölfar samtalsins í Bítinu á Bylgjunni.
Morgunblaðið átti í samskiptum við Stefán vegna málsins. Í smáskilaboðum til blaðsins kemur fram að Stefán vill halda áfram sem útvarpsstjóri.
„Málið er á borði stjórnar samkvæmt lögum. Ég hef gert stjórninni grein fyrir því að ég sé reiðubúinn að gegna starfinu áfram þegar núverandi ráðningartímabili lýkur á næsta ári,“ segir í skilaboðum Stefáns.
Stefán hefur staðið í kröppum dansi vegna Símamáls Páls Steingrímssonar skipstjóra. Ríkisútvarpið er talið hafa gegnt lykilhlutverki við að brjóta upp síma Páls og framvísa gögnum úr símanum á aðra fjölmiðla.
Starfsmenn RÚV með Þóru Arnórsdóttur, þáverandi ritstjóra Kveiks, í broddi fylkingar hafa verið til rannsóknar hjá lögreglunni á Akureyri vegna þess máls. Þeir hafa neitað að gefa upp nafn tæknimannsins sem tók við símanum.
Lögreglan er hætt rannsókn en búist er við að þeirri ákvörðun verði vísað til ríkissaksóknara. Þá er til skoðunar að stefna starfsmönnum RÚV og jafnvel stofnuninni sjálfri í einkamáli. Skuggi símamálsins hefur verið yfir stofnunni og þá ekki síst Stefáni Eiríkssyni undanfarin ár. Þá hefur rekstur RÚV verið erfiður og stofnunin lifað að nokkru leyti af eignasölu.
Morgunblaðið segir að búist sé við að gengið verði frá endurráðningu Stefáns á stjórnarfundi síðar í þessum mánuði.