Talsvert hefur verið um að göngufólk á leið á gosstöðvarnar í Geldingadal hafi slasast við að hrasa í brattri brekku á gönguleiðinni á þessar slóðir. Björgunarsveitir hafa unnið gott verk í að merkja gönguleiðina við norðanvert Borgarfjall. Vandinn er hinsvegar brött brekka upp á fjallið þar sem göngfólk fer beint upp og rennur gjarnan til í lausamöl. Brekkan er að vissu marki stórhættuleg fólk sem er illa skóað og óvant. Búið er að koma fyrir kaðli á leiðinni upp sem fólk getur stutt sig á leið upp og niður. Vandinn er sá að af því getur skapast smithætta í stað slysahættu.
Lausnin í brekkunni er mjög einföld. Skáskera þarf brekkuna og stika vandlega. Þá verður slysahættan að baki. Mannlíf ræddi þetta við björgunarsveitarmenn sem ætluðu að koma hugmyndinni áleiðis. Þeir sem ekki vilja fara um Bröttubrekku geta gengið sunnan við Borgarfjall, um Nátthaga. Sú leið er mun léttari en talsvert lengri.