Svikahrappar nýta gjafaleiki á Facebook til að klekkja á þeim sem taka þátt. Fjölmörg fyrirtæki á Facebook bjóða reglulega upp á gjafaleiki á samfélagsmiðlinum þar sem boðið er upp á að skrifa athugasemdir og/eða tagga vin/i í von um að hljóta vinning. Leikjaglaðir ættu þó að hafa varann á því svo sem virðist sem svikahrappar nýti sér leikina til að reyna að klekkja á þeim sem tekið hafa þátt.
Ingvar Thor Gylfason listmálari vekur athygli á þessu í færslu á síðu sinni, en á henni er nú í gangi leikur þar sem málverk af Lómagnúpi er í verðlaun. Svo virðist sem svikahrappar hafi nýtt sér gjafaleik hans til að klekkja á þáttakendum.
„Af gefnu tilefni langar mig til þess að vara alla við því að smella á linka sem virðast koma frá mér í sambandi við gjafaleikinn. Það er óprúttinn aðili að þykjast vera ég í von um að að svindla eitthvað býst ég við. Ég er búinn að gera allt sem ég get gert til að banna og tilkynna viðkomandi og biðla ég líka til ykkar að gera það sama svo viðkomandi geti ekki haldið þessu áfram,“ segir Ingvar Thor.
Þrátt fyrir svikatilraunirnar ætlar Ingvar Thor að halda ótrauður áfram með gjafaleikinn. „Ég dreg 24. ágúst. Það er ekkert breytt. Takk allir sem sendu mér skilaboð og létu mig vita. Saman náum við að stoppa svona óværu.“