Kayla Williams, 36 ára þriggja barna bresk móðir, er talin hafa látist af völdum COVID-19 á laugardaginn á heimili sínu í London. Kayla lést eftir að hafa fengið þær upplýsingar að hún yrði ekki flutt á sjúkrahús vegna þess að hún væri ekki í hópi þeirra sem njóta forgangs.
Guardian greinir frá. Þar segir að Fabian Williams, eiginmaður Kaylu, hafi hringt á neyðarlínuna á föstudeginum og lýst líðan hennar og einkennum. Kayla var með hósta, háan hita og verki í brjóstholi og maga.
„Ég hringdi í neyðarlínuna vegna þess að hún var andstutt, hún ældi og var með magaverki. Þegar ég var í símanum þá versnaði ástand hennar og þeir sögðu mér að leggja hana á gólfið,“ er haft eftir Fabian í frétt Guardian.
Sjúkraliðar komu á heimili þeirra klukkan 8:32 á föstudagsmorgninum. Hjónunum var sagt að ekki væri hægt að flytja Kaylu á spítala þar sem hún væri ekki í hópi þeirra sem njóta forgangs. Fabian segir sjúkraliða hafa stoppað stutt og skrifað skýrslu fyrir utan heimili þeirra.
Kayla fékk þau ráð að hún ætti að halda sig heima og fara vel með sig.
Fabian segir líðan Kaylu hafa farið versnandi næsta dag. Skömmu eftir að hann hjálpaði henni í bað, klæddi hana og gaf henni að borða lést hún.
Fabian hringdi í neyðarlínuna og fékk leiðbeiningar um að reyna endurlífgun. Skömmu síðar komu sjúkraliðar á vettvang og héldu áfram að reyna endurlífgun en án árangurs.
Fabian segir lögreglu hafa komið og tekið skýrslu og seinna kom teymi í hlífðargöllum og sótti lík Kaylu. „Ég hef ekkert heyrt síðan,“ segir Fabian í samtali við Guardian.