Mannlíf fjallaði fyrr í dag um Facebook-færslu Árdísar Pétursdóttur þar sem hún lýsti árás sem eiginmaður hennar, Destiny Mentor Nwaokoro, varð fyrir í vinnunni þegar viðskiptavinur veittist að honum og kallaði hann meðal annars „negra“. Destiny starfar í Krónunni.
Björn Másson, mannauðsstjóri Krónunnar, segir í samtali við Mannlíf að Destiny hafi verið boðin áfallahjálp. Spurður út í hvort hann hafi þegið hana segir hann: „Nei, ekki enn en við erum í góðu sambandi við hann og hans nánustu.”
Aðspurður hvar málið standi núna, hvort að lögregla viti hver árásarmaðurinner, segir Björn: „Mér skilst að það sé vitað hver einstaklingurinn er en málið er í höndum lögreglu og við munum að sjálfsögðu aðstoða lögreglu á allan hátt.”
Björn tekur fram að því miður hafi ekki verið hringt á lögregluna þegar atvikið átti sér stað en það hefði átt að gera. Björn segir að nú sé búið að fara aftur yfir verklagsreglurnar innanhúss og minna verslunarstjóra Krónunnar á hvernig skuli bregðast við atvikum sem þessum.
Sjá einnig: Árdís lýsir árás sem eiginmaður hennar varð fyrir: „Rasisminn lifir góðu lífi hér á landi“