Meirihluti nýrra bíla sem seldust á Íslandi í fyrra voru rafbílar, að fullu eða hluta, eins og segir á ruv.is.
Innan við þriðjungur voru bílar sem nota jarðefnaeldsneyti einungis.
Bílaframleiðandinn Telsa ákvað að lækka verð á bílum sínum um 20% nýverið; enda hafi svigrúm til lækkunar skapast vegna hagkvæmni í framleiðslu.
Framkvæmdastjóri Félags íslenskra bifreiðaeigenda, Runólfur Ólafsson, segir að Tesla hafi stóraukið framleiðslugetu sína undanfarið:
„Þeir hafa meðal annars komið fram með svokallaða gígaverksmiðju í Berlín og þá er styttra varðandi aðdrætti og flutning á bílunum inn á evrópska markaði. Þess vegna hafa þeir möguleika á að framleiða bæði ódýrar og bjóða þá í leiðinni neytendum uppá ódýrari ökutæki.
Markaðurinn er ekki eyland þannig að menn verða að horfa í það þegar að svona stór keppinautur kemur inn á markaðinn með svona mikla lækkun. Þetta mun strax skila sér í lækkun á eftirmarkaði með notaðar Teslur og svo munu aðrir rafbílar á eftirmarkaði lækka í verði og þetta mun hafa áhrif á markaðinn í heild sinni vegna þess að samkeppnisaðila Tesla á markaði verða að mæta þessu með einhverjum hætti.“
Kemur fram að um 17 þúsund nýir bílar voru seldir á Íslandi í fyrra; rúmum 30% meiri sala en árið á undan.
Þriðjungur nýrra bíla sem seljast eru rafbílar, 22,6% tengiltvinnbílar og 17,8% blendingsbílar (e. hybrid).
Dísilbílar voru 14,2% og bensínbílar 11,9%.
Tveir þriðju nýrra bíla sem seljast hér á landi eru því rafbílar að fullu eða hluta til.